यावेळी महापालिका मुख्यालयातील विशेष समिती सभागृहात आयुक्त श्री. अण्णासाहेब मिसाळ यांच्या समवेत अतिरिक्त आयुक्त श्रीम. सुजाता ढोले व श्री. संजय काकडे आणि इतर विभागप्रमुख व अधिकारी सोशल डिस्टन्सींगचे पालन करून उपस्थित होते. आपत्ती व्यवस्थापन विभागाचे उपआयुक्त श्री. दादासाहेब चाबुकस्वार यांनी प्रास्ताविक केले.
या बैठकीत त्यांनी पावसाळापूर्व गटारे सफाई 31 मे पर्यंत व नालेसफाई एका आठवड्यात तातडीने पूर्ण करावी व त्यामधून निघणारा गाळ लगेच दुस-या दिवशी उचलण्यात यावा असे निर्देश दिले. होल्डींग पाँड्स हे शहराची कवच कुंडले असून त्यावरील फ्लॅप गेट दुरुस्त करण्याचे अंतिम टप्प्यात असलेले काम तातडीने पूर्ण करावे असेही आयुक्तांनी सूचित केले. मोठा पाऊस आणि भरतीची वेळ एकच झाल्यास नवी मुंबई शहर हे समुद्र सपाटीपेक्षा कमी पातळीवर वसलेले असल्याने शहरातील काही भागात पाणी साचते, ही संभाव्य ठिकाणे लक्षात घेऊन तेथे पाणी उपसा पंपांची सख्या वाढविण्याचे निर्देश आयुक्तांनी दिले. त्याचप्रमाणे भूस्खलनाच्या संभाव्य जागा लक्षात घेऊन त्याठिकाणाहून काही प्रमाणात झोपड्या असल्यास त्या हलवाव्यात असेही विभागांच्या सहा. आयुक्तांना निर्देशित करण्यात आले.
महानगरपालिका क्षेत्रातील धोकादायक इमारतींचे विभाग कार्यालयांच्या माध्यमातून तातडीने सर्वेक्षण करून त्याची सूची प्रसिध्द करावी व तसे फलक त्याठिकाणी लावावेत असे निर्देशित करतानाच सध्या सुरु असलेली स्थापत्य विषयक कामे तातडीने करून घ्यावीत असे सूचित करण्यात आले. उद्यान विभागामार्फत झाडांची छाटणी करताना व्यवस्थित आकार दिसेल अशाप्रकारे विहित वेळेत करावी अशाही सूचना आयुक्तांनी दिल्या.
कोरोनाच्या पार्श्वभूमीवर पावसाळी कालावधीत उद्भवणारे साथीचे आजार लक्षात घेऊन आरोग्य विभागाने सर्वोतोपरी खबरदारी घ्यावी व अनुषंगीक कार्यवाही करावी असे आयुक्तांनी विशेषत्वाने निर्देश दिले. पावसाळ्यामध्ये पाणी पुरवठा, विद्युत व्यवस्था सुरळीत राहील याकडे विशेष लक्ष देण्याचे त्यांनी अभियांत्रिकी विभागाला सूचित केले. पावसाळ्यात कुठेही वाहतुक कोंडी होणार नाही याची दक्षता घेण्यासोबत सिग्नल यंत्रणा सुरळीत राहिल याविषयी दक्षता घ्यावी अशा सूचना आयुक्तांनी दिल्या. एम.एस.ई.डी.सी. यांच्याशी समन्वय साधून ज्याठिकाणी ट्रान्सफॉर्मरला झाकणे नाहीत तसेच केबल उघड्या आहेत त्या त्वरीत दुरुस्त करून घेणेबाबत व संभाव्य अपघात टाळण्याबाबत एम.एस.ई.डी.सी. ला सूचित करावे असे आयुक्तांनी विद्युत विभागाला सांगितले. पावसाळापूर्व कामांच्या अनुषंगाने नवी मुंबई महानगरपालिका क्षेत्रातील इतर एम.आय.डी.सी., सिडको, सार्वजनिक बांधकाम विभाग, एम.एम.आर.डी.ए., रेल्वे, एम.टी.एन.एल., एम.एस.ई.डी.सी., प्राधिकरणांना या पूर्वीच्या शहर आपत्ती व्यवस्थापन समिती बैठकीत सूचना देण्यात आल्या होत्या त्याची अंमलबजावणी होत असल्याबाबत संबंधीत महापालिका विभागांनी पाहणी करावी व पाठपुरावा करावा असेही निर्देश आयुक्तांनी दिले. सर्व प्राधिकरणांनी समन्वय राखून कार्यकृती करावी अशा सूचना महापालिका आयुक्त श्री. अण्णासाहेब मिसाळ यांनी यावेळी दिल्या.
कोरोनाशी लढताना त्यासोबतच आगामी पावसाळी कालावधी लक्षात घेऊन नागरिकांना कोणत्याही प्रकारचा त्रास होणार नाही याची दक्षता घेत पावसाळापूर्व कामांकडे काटेकोर लक्ष देणे गरजेचे असल्याचे स्पष्ट करीत महापालिका आयुक्त तथा शहर आपत्ती व्यवस्थापन समितीचे अध्यक्ष श्री. अण्णासाहेब मिसाळ यांनी महानगरपालिकेच्या सर्व विभागांनी आपली पावसाळा पूर्व कामे तातडीने पूर्ण करावीत व 1 जून पर्यंत केलेल्या कामाचा कार्यपूर्तता अहवाल आपत्ती व्यवस्थापन विभागाकडे द्यावा असे निर्देश महापालिका आयुक्त श्री. अण्णासाहेब मिसाळ यांनी दिले.
No comments:
Post a Comment