कोव्हीड 19 उपाययोजनांमध्ये रूग्णवाहिकांचे सुयोग्य व्यवस्थापन

नवी मुंबई महानगरपालिकेच्या वतीने कोव्हीड 19 चा प्रादुर्भाव रोखण्यासाठी विविध उपाययोजना करण्यात येत असून कोव्हीड 19 बाधित रूग्णांवर उपचारासाठी महापालिका आयुक्त श्री. अण्णासाहेब मिसाळ यांच्या मार्गदर्शनाखाली केंद्रीय कुटुंब कल्याण मंत्रालयाच्या मार्गदर्शक सूचनांनुसार, कोव्हीड केअर सेंटर (CCC), डेडिकेटेड कोव्हिड हेल्थ सेंटर (DCHC) व डेडिकेटेड कोव्हीड हॉस्पिटल (DCH) अशी त्रिस्तरीय रचना करण्यात आलेली आहे.

यामध्ये एक महत्वाचा भाग रूग्णवाहिकांचा असल्याचे लक्षात घेत आयुक्त श्री. अण्णासाहेब मिसाळ यांनी उपलब्ध रूग्णवाहिकांचे विभाग निहाय सुयोग्य नियोजन करण्याकडे विशेष लक्ष दिलेले आहे. यामध्ये नवी मुंबई महानगरपालिकेकडे स्वत:च्या 12 रूग्णवाहिका असून 5 रूग्णवाहिका जिल्हाधिकारी कार्यालयामार्फत आरटीओ च्या सहयोगाने उपलब्ध करून देण्यात आलेल्या आहेत. त्याचप्रमाणे एन.एम.एम.टी.च्या 4 बसेसचे रूग्णवाहिका स्वरूपात तात्पुरते रूपांतरण करण्यात आले असून आणखी 4 बसेसची रूग्णवाहिका रूपांतरण प्रक्रिया सुरू आहे.

या उपलब्ध रूग्णवाहिकांतून कोव्हीड 19 च्या रूग्णांना ने - आण करण्यासाठी सुयोग्य व्यवस्थापन करतानाच काही रूग्णवाहिका इतर आजारांच्या सर्वसाधारण रूग्णांसाठीही कार्यान्वित ठेवण्याकडे लक्ष देण्यात आले आहे. जेणेकरून कोव्हीड व्यतिरिक्त इतर आजारांच्या रूग्णांची गैरसोय होऊ नये.

सद्यस्थितीत, वाशी येथील डेडिकेटेड कोव्हीड रूग्णालयाकडे कोव्हीड 19 रूग्णांसाठी 3 रूग्णवाहिका कार्यान्वित आहेत. तसेच इतर सर्वसाधारण रूग्णांसाठी 2 रूग्णवाहिका कार्यान्वित आहे. त्याचप्रमाणे सेक्टर 14 वाशी येथील कोव्हिड केअर सेंटर करिता 1  रूग्णवाहिका सेवेत आहे. या व्यतिरिक्त वाशी रूग्णालयामध्ये 2 शववाहिका असून त्यामधील एक पूर्णपणे कोव्हीडमुळे निधन झालेल्या व्यक्तींच्या पार्थिवासाठी वेगळी ठेवण्यात आलेली आहे.

याशिवाय नेरूळ येथील माँसाहेब मिनाताई ठाकरे रूग्णालयात 3 रूग्णवाहिका या कोव्हीड 19 रूग्णांकरिता वापरात असून सर्वसाधारण रूग्णांकरिता 2 रूग्णवाहिका कार्यान्वित आहेत.

तसेच राजमाता जिजाऊ रूग्णालय, ऐरोली अंतर्गत 2 रूग्णवाहिका कोव्हीड 19 रूग्णांकरिता उपयोगात आहेत आणि 2 रूग्णवाहिका इतर आजारांच्या रूग्णांसाठी वापरात आणल्या जात आहेत.

त्याचप्रमाणे, माता बाल रूग्णालय बेलापूर अंतर्गत 1 रूग्णवाहिका सर्वसाधारण रूग्णांकरिता व 1 रूग्णवाहिका कोव्हिड 19 रूग्णांकरिता उपयोगात आणली जात आहे. तसेच इंडिया बुल्स येथील कोव्हिड केअर सेंटरकरिता 1 रूग्णवाहिका व बहुउद्देशीय इमारत, सेक्टर 3, सी.बी.डी. बेलापूर येथील कोव्हीड केअर सेंटर करिता 1 रूग्णवाहिका कोव्हिड 19 रूग्णांकरिता कार्यान्वित आहे. 

यासोबतच खैरणे व सानपाडा  नागरी आरोग्य केंद्रांमध्येही कोव्हिड 19 रूग्णांकरिता स्वतंत्र रूग्णवाहिकांची व्यवस्था करण्यात आलेली आहे.

याव्यतिरिक्त एन.एम.एम.टी.च्या 4 बसेसचे रूग्णवाहिका स्वरूपात रूपांतरण करण्यात आले असून सदर रूग्णवाहिका स्वरूपातील बसेस पॉझिटिव्ह रूग्णाच्या संपर्कातील व्यक्ती व क्वारंटाईन करावयाच्या व्यक्ती अशा व्यक्तींसाठी वापरल्या जात आहेत. सदर बसेस स्वरूपातील रूग्णवाहिका 2 वाशी येथील सार्वजनिक रूग्णालयाकडे तसेच 1 ऐरोली व 1 इंडिया बुल्स येथे कार्यान्वित आहेत. 

याशिवाय आमदारांच्या स्थानिक विकास निधीमधून 3 रूग्णवाहिका घेण्याचा प्रस्ताव ठाणे जिल्हाधिकारी कार्यालयाकडे पुढील कार्यवाहीस्तव पाठविण्यात आलेला आहे.

सदर रूग्णवाहिकांचे नियोजन व्यवस्थित रितीने होण्याकरिता अद्ययावत जीपीएस तंत्रप्रणालीचा वापर करण्यात येत असून त्यावरील  नियंत्रणासाठी वाहन विभाग व एन.एम.एम.टी. विभाग अशा दोन अधिका-यांची नेमणूक करण्यात येत आहे.

कोव्हिड 19 रूग्णांसाठी स्वतंत्र रूग्णवाहिकांची सुयोग्य व्यवस्था करताना इतर आजारांच्या रूग्णांचीही गैरसोय होऊ नये याकडे महापालिका आयुक्त श्री. अण्णासाहेब मिसाळ यांच्या मार्गदर्शनाखाली विशेष लक्ष देण्यात आले आहे.